10 حاجات مانعرفهاش عن شارع “فؤاد” في الإسكندرية

10 حاجات مانعرفهاش عن شارع “فؤاد”

1- هو واحد من اهم واقدم شوارع وسط الاسكندرية …هوشارع من الشارعين الرئيسين في تخطيط المدينة القديم امتداد الشارع زمان ودلوقتي ماختلفش كتير …بدايته عند نقطة شريف (قسم العطارين حاليا ) ونهايته عند ساعة الزهور..

2-اتعرف الشارع قديما بأسم “الطريق الكانوبي ” وفي ايام العرب اطلق عليه “بوابة رشيد “..واتعرف بعد كدة باسم “فؤاد الاول” واتحول بعد ثورة 1952 الي “طريق الحرية”….قال عنه الاسقف “أخليوس تايوس” لما زار الاسكندرية عام 400 م. انه لما دخل المدينة من “باب الشمس” …باب رشيد” رأى شارع شديد الجمال والفخامة مصفوف بالاعمدة الرخامية من بدايته لنهايته.

3-في عام 1880 الخديو توفيق قرر ان يعيد تخطيط الشارع وفعلا كلف مهندس ايطالي اسمه “فيلو بيني” انه يخطط الشارع من اول وجديد واتعرف وقتها الشارع ” بحي التوفيقية او الحي اللاتيني “…المهندس مش بس خطط ونظم الشارع ده بني وصمم 3 قصور فخمة جدا والقصور دي موجودة لغاية دلوقتي وهي “مدرسة بلقيس & مديرية الصحة & والمركز الثقافي الاسباني ”

4-الشارع اهميته مش بس تاريخية كون انه من اقدم شارعين في الاسكندرية لأ الشارع عبارة عن تحفة معمارية متكاملة اللي بتتميز بالطراز اليوناني الممزوج بالفن الايطالي المعماري اللي معروف “بالفلرونسي ” وعلشان كدة الشارع اتسجل كمنطقة حفظ تراث واتمنع هدم اي مبني او حتي التعديل فيه الا بموافقة وزارة الاثار (وده طبعا مش بيحصل )

5-لو بصينا مثلا من بداية الشارع وتحديدا علي ايدينا اليمين هنلاقي مبني “نقظة شريف” ..قسم العطارين حاليا …واللي كان مركز الحراسة البريطانية الرئيسي في الاسكندرية علي الناصية التانية في وشه بالظبط كان فيه معبد صغير للاله سرابيس واللي اتحول في أوائل القرن 19 “لنادي محمد علي ” واللي كان لهم النوادي الثقافية في مصر علي الاطلاق واللي بقي دلوقتي “مركز الحرية للابداع ”

6-لو مشينا قدام شوية علي الناحية الشمال هنلاقي مسرح “سيد درويش ” او ” دار الاوبرا ” اللي اتبني سنة 1918 وكان معروف “بتياترو محمد علي” والاسم ده موجود لغاية دلوقتي علي اللوحة التأسيسة للمسرح واتحول سنة 1964 لمسرح سيد درويش…المسرح تصميمه مستوحي من دار الاوبرا في فنسيا ومسرح الاودين في باريس اول عرض اتعرض فيه كان سنة 1921 والمسرح بيتسع لحوالي 1000شخص

7-لو وصلنا لاخر الشارع وعلي الناحية الشمال بردو هنلاقي المتحف القومي واللي كان فيلا لتاجر اخشاب اسمه اسعد باسيلي واللي اتبنت علي الطراز الايطالي بردو واشتراها المجلس الاعلي للاثار سنة 1996 ب 12 مليون جنيه وحولته لمتحف قومي لاسكندرية

8-المصرين ماكنش ليهم تواجد في الشارع كان معظم رواد الشارع من الجاليات الاوربية والايطالية واليونانية والاثرياء وعلية القوم ومن اشهر سكان الشارع اليوناني الشاعر “كفافيس” وعائلات “الكونت زغيف”…وعائلة سرقس وعائلة ابو شنب ….
9-مش بس كدة الشارع اتذكر في واحدة من اهم روايات الادب العالمي وهي “رباعية الاسكندرية” واللي كتبها الروائي الانجليزي “لورانس داريل”….واللي احداث الرواية كلها مستوحاه من الشارع ده كمان ابطال الرواية كانوا بيعيشوا في الشارع نفسه وكانوا بيتقبلوا في صالة الشاي “بسترودس ”

10-هي ايه بسترودس دي ….دي واحدة من اهم صالات الشاي والحلويات اللي اتعملت علي الطراز اليوناني سنة 1923 ومكانها كان موجود في في ضهر سينما امير وكان بعتبر من افضل الاماكن لانور السادات…المكان كان موجود لغاية فترة قريبة لكن للاسف اتحول لمطعم واتسمي “ابو السيد”…كمان كان فيه صالة شاي تانية علي نفس الطراز اليوناني موجودة في تقاطع النبي دانيال مع شارع فؤاد واللي كانت معروفة باسم “فينوس” واللي كان بيقعد فيها النحاس باشا وفؤاد سراج الدين واحمد ماهر واسماعيل صدقي لكن للاسف بردو اتحول فينوس مؤخرا لمطعم جاد !!!!!!! ….شارع فؤاد كمان كان فيه اول صالة عرض سينمائي في مصر واللي اتعرفت بأسم “صالة طوسن” واتعرض فيها اول فيلم سنة 1896..كمان فيه كتير من السينمات اللي موجودة لغاية دلوقتي زي بلازا رويال اللي بنها ال قرداحي اللبنانين الاصل وسينما امير وسنيما ريو اللي كانت مطعم فول وفلافل لاحد الاتراك .